Ganesh Patri Health Benefit’s in Telugu
వినాయక పూజలో ఉపయోగించే పత్రాలు గురించి తెలుసుకుందాం.
గణపతికి సమర్పించే పత్రి (పత్రాలు) ప్రతి ఒక్కటి ప్రత్యేకమైన ఔషధ గుణాలు కలిగి ఉంటాయి. వీటిని వేదాలు, ఆయుర్వేద గ్రంథాలు కూడా ప్రస్తావించాయి. ఇవి శరీరానికి ఆరోగ్యాన్ని ప్రసాదిస్తాయని విశ్వాసం. ముఖ్యంగా వినాయక చవితి పూజలో ఉపయోగించే 21 పత్రాలలోని ఔషధ గుణాలు ఇలా ఉన్నాయి:
సుముఖాయ నమః – మాచీ పత్రం పూజయామి
నేత్రములకు మంచి ఔషధము. ఆకుని తడిపి కళ్ళ మీద ఉంచుకోవాలి. పసుపూ నూనెతో నూరి ఒంటికి రాసుకోవాలి.
గణాధిపాయ నమః – బృహతీ పత్రం పూజయామి
నేలమునుగ ఆకులు – ఆకులను నూరి నీటితో సేవిస్తే దగ్గు తగ్గును. శరీరమునకు దివ్యఔషధము.
ఉమాపుత్రాయ నమః – బిల్వపత్రం పూజయామి
మారేడు ఆకులు – మూల శంక నయమగును. రోజూ రెండు ఆకులని నమిలి రసాన్ని నిదానంగా మింగాలి. కాయలోని గుజ్జుని ఎండబెట్టి పొడిచేసి మజ్జిగలో వేసుకుని తాగాలి.
గజాననాయ నమః – దూర్వాయుగ్మం పూజయామి
జంటగరిక ఆకు – మూత్ర సంబంధ వ్యాధులు తొలుగును. పచ్చడి చేసుకొని తినవలెను.
హరసూనవే నమః – దత్తూరపత్రం పూజయామి
ఉమ్మెత్త ఆకు – మానసిక రోగాలు తొలగును. ఆకుల రసాన్ని తీసి రోజూ తలమీద మర్దన చేయాలి.
లంబోదరాయ నమః – బదరీ పత్రం పూజయామి
రేగు ఆకు – శరీర సౌష్టవానికి శ్రేష్టం. మితంగా తింటే మంచిది.
గుహాగ్రజాయ నమః – అపామార్గపత్రం పూజయామి
ఉత్తరేణి ఆకులు – దంతవ్యాధులు నయమగును. ఈ కొమ్మ పుల్లతో పళ్ళు తోముకోవాలి.
గజకర్ణాయ నమః – తులసీపత్రం పూజయామి
తులసీ ఆకులు – దగ్గు, వాంతులు, సర్వ రోగనివారిణి. రోజు ఐదు, ఆరు ఆకులను తింటే మంచిది.
ఏక దంతాయ నమః – చూత పత్రం పూజయామి
మామిడి ఆకు – కాళ్ళ పగుళ్ళు, అతిసారం నయమగును. మామిడి జిగురులో ఉప్పు కలిపి వేడి చేసి పగుళ్ళకు రాయాలి.
వికటాయ నమః – కరవీర పత్రం పూజయామి
గన్నేరు ఆకు – జ్వరమును తగ్గించును[లోనికి తీసుకోరాదు]
భిన్నదంతాయ నమః – విష్ణుక్రాంత పత్రం పూజయామి
అవిసె ఆకు – రక్త దోషాలు తొలగును. ఆకు కూరగా వాడవచ్చు.
సురసేవితాయ నమః – అర్జున పత్రం పూజయామి
మద్ది ఆకులు – వ్రణాలు తగ్గును. వ్రణాలున్న భాగాల్లో ఆకులను నూరి రాసుకోవాలి.
సర్వేశ్వరాయ నమః – దేవదారు పత్రం పూజయామి
దేవదారు ఆకులు – శ్వాశకోశ వ్యాధులు తగ్గును
ఫాలచంద్రాయ నమః – మరువక పత్రం పూజయామి
మరువం ఆకులు – శరీర దుర్వాసన పోగొట్టును. వేడినీటిలో వేసుకొని స్నానం చేయవలెను.
హేరంబాయ నమః – సింధువార పత్రం పూజయామి
వావిలి ఆకు – ఒంటినొప్పులను తగ్గించును. నీటిలో ఉడికించి స్నానం చేస్తె మంచిది.
సురాగ్రజాయ నమః – గండకీ పత్రం పూజయామి
గండకీ ఆకు – వాత రోగములు నయమగును
ఇభవక్త్రాయ నమః – శమీపత్రం పూజయామి
జమ్మి ఆకులు – కుష్ఠు వ్యాధులు తొలగును. ఆకుల పసరును ఆయా శరీర భాగాలలో రాసుకోవాలి.
శూర్పకర్ణాయ నమః – జాజీ పత్రం పూజయామి
జాజి ఆకులు – నోటి దుర్వాసన పోగొట్టును. ఆకులను వెన్నతో కలిపి నూరి పళ్ళు తోముకోవాలి.
వినాయకాయ నమః – అశ్వత్థ పత్రం పూజయామి
రావి ఆకులు – శ్వాసకోశ వ్యాధులు తగ్గును. పొడి చేసి తేనెతో సేవిస్తే మంచిది.
వటవే నమః – దామిడీ పత్రం పూజయామి
దానిమ్మ ఆకు – అజీర్తి, ఉబ్బసం తగ్గును. పొడిచేసి కషాయంగా తాగవచ్చు.
కపిలాయ నమః – అర్క పత్రం పూజయామి
జిల్లేడు ఆకులు – వర్చస్సు పెంచును.
Related Stories:
వినాయకుని పూజ ఏ విధంగా చేస్తే ఎటువంటి దోషం పోతుంది? | Ganesh Pooja for Dosha Nivarana in Telugu
Sankashtahara Chaturthi 2025 | సంకష్టహర చతుర్థి, ప్రాముఖ్యత, పాటించవలసిన ముఖ్య నియమములు ఏమిటి?
