లక్ష్మీకటాక్షము అంటే ఏమిటి ? | What is meant by Lakshmi kataksham in Telugu

ఈ  విషయాన్ని ఉపనిషత్తులు ఇలా చెపుతున్నాయి  ” కారుణ్య  రూపిణి  అయిన  లక్ష్మీదేవి సాహచర్యం వల్లనే శ్రీమన్నారాయణుడు  సర్వరక్షకుడు అవుతున్నాడు” కాబట్టి ఆ  లక్ష్మీదేవి  యొక్క  కారుణ్యాన్ని అనుసరించే భగవానుడు మనలను  రక్షిస్తాడు.  మన రక్షణ కోసమే  ఆ తల్లి  నిరంతరం స్వామిని విడిచి పెట్టక ఉంటుంది.  అలా ఎందుకంటే?   అనేక  అపరాధాలను చేసిన  మనలను  చూసి కోపించి  శిక్షించాలనే స్వామీ తో “ఎందుకీ కోపం?  ఈ లోకంలో  తప్పు చేయని వారు ఎవరైనా  ఉన్నారా? తండ్రే కోపంతో  శిక్షిస్తే , వారిని ప్రేమతో  మంచి మార్గంలో పెట్టేది ఎవరు?”  అని  స్వామిని శాంతపరిచి  మనకు  ఆనందాన్ని  కలిగించేందుకే”   అని  సమాధానం చెపుతున్నారు శ్రీ పరాశరులవారు.  కనుక  ఆ  కటాక్షాన్ని   వర్ణించడం బ్రహ్మాదులకు కూడా శక్తి చాలదు.

ఈ  లోకంలో  ఉన్నతమైనవి, మంగళకరమైనవి , ప్రకాశించేవి,  గొప్పవి, పవిత్రమైనవి, పవిత్రం చేసేవి, అదృష్టం  కలిగించేవి అయిన  పదార్ధాలన్నీ  కూడా  ఆ  తల్లి  యొక్క  కటాక్షం   కొంచం ప్రసరించడం చేతనే  ఏర్పడ్డాయి  అందరు  మానవులే అయినా  వారి వారి  కర్మలను బట్టి  ఆ  తల్లి  కటాక్షంలో  తేడా వుంటుంది.  మనము  ఎన్ని తప్పులు చేసినా మనము అమ్మా అని అంటే  తన  కనుబోమలను వారి వైపు ప్రీతిగా  కదిల్చి వారికి ప్రీతి, జ్ఞానం , మంచి వాక్కు, స్తైర్యం , పరిపూర్ణత, కార్యసిద్ధి , సంపదలు అన్నీ పోటీపడి వచ్చేట్లు చేస్తుంది.

ఎంతవారికైనా లక్ష్మీ కటాక్షం కావాలి! కనుక  అమ్మా  అని  పిలిచినా  వెంటనే పలికే  ఆ  అమ్మకు ప్రీతికరమైన  శ్రావణ మాసంలో అ చల్లని తల్లిని  అర్చించుటకు  కృతకృత్యులము  అవుదాము.