Manidweepa Varnanam (Devi Bhagavatam) Part 2 in Telugu | మణిద్వీపవర్ణనం (దేవీభాగవతం) – ౨

ధావమానాస్తు శోభంతే సర్వా విద్యుల్లతోపమాః |
కుశలాః సర్వకార్యేషు వేత్రహస్తాః సమంతతః || ౫౧ ||

అష్టదిక్షు తథైతాసాం ప్రాకారాద్బహిరేవ చ |
సదనాని విరాజంతే నానావాహనహేతిభిః || ౫౨ ||

వజ్రసాలాదగ్రభాగే సాలో వైదూర్యనిర్మితః |
దశయోజనతుంగోఽసౌ గోపురద్వారభూషితః || ౫౩ ||

వైదూర్యభూమిః సర్వాపి గృహాణి వివిధాని చ |
వీథ్యో రథ్యా మహామార్గాః సర్వే వైదూర్యనిర్మితాః || ౫౪ ||

వాపీకూపతడాగాశ్చ స్రవంతీనాం తటాని చ |
వాలుకా చైవ సర్వాపి వైదూర్యమణినిర్మితా || ౫౫ ||

తత్రాష్టదిక్షు పరితో బ్రాహ్మ్యాదీనాం చ మండలమ్ |
నిజైర్గణైః పరివృతం భ్రాజతే నృపసత్తమ || ౫౬ ||

ప్రతిబ్రహ్మాండమాతౄణాం తాః సమష్టయ ఈరితాః |
బ్రాహ్మీ మాహేశ్వరీ చైవ కౌమారీ వైష్ణవీ తథా ||౫౭ ||

వారాహీ చ తథేంద్రాణీ చాముండాః సప్త మాతరః |
అష్టమీ తు మహాలక్ష్మీర్నామ్నా ప్రోక్తాస్తు మాతరః || ౫౮ ||

బ్రహ్మరుద్రాదిదేవానాం సమాకారాస్తు తాః స్మృతాః |
జగత్కల్యాణకారిణ్యః స్వస్వసేనాసమావృతాః || ౫౯ ||

తత్సాలస్య చతుర్ద్వార్షు వాహనాని మహేశితుః |
సజ్జాని నృపతే సంతి సాలంకారాణి నిత్యశః || ౬౦ ||

దంతినః కోటిశో వాహాః కోటిశః శిబికాస్తథా |
హంసాః సింహాశ్చ గరుడా మయూరా వృషభాస్తథా || ౬౧ ||

తైర్యుక్తాః స్యందనాస్తద్వత్కోటిశో నృపనందన |
పార్ష్ణిగ్రాహసమాయుక్తా ధ్వజైరాకాశచుంబినః || ౬౨ ||

కోటిశస్తు విమానాని నానాచిహ్నాన్వితాని చ |
నానావాదిత్రయుక్తాని మహాధ్వజయుతాని చ || ౬౩ ||

వైదూర్యమణిసాలస్యాప్యగ్రే సాలః పరః స్మృతః |
దశయోజనతుంగోఽసావింద్రనీలాశ్మనిర్మితః || ౬౪ ||

తన్మధ్యభూస్తథా వీథ్యో మహామార్గా గృహాణి చ |
వాపీకూపతడాగాశ్చ సర్వే తన్మణినిర్మితాః || ౬౫ ||

తత్ర పద్మం తు సంప్రోక్తం బహుయోజన విస్తృతమ్ |
షోడశారం దీప్యమానం సుదర్శనమివాపరమ్ || ౬౬ ||

తత్ర షోడశశక్తీనాం స్థానాని వివిధాని చ |
సర్వోపస్కరయుక్తాని సమృద్ధాని వసంతి హి || ౬౭ ||

తాసాం నామాని వక్ష్యామి శృణు మే నృపసత్తమ |
కరాళీ వికరాళీ చ తథోమా చ సరస్వతీ || ౬౮ ||

శ్రీ దుర్గోషా తథా లక్ష్మీః శ్రుతిశ్చైవ స్మృతిర్ధృతిః |
శ్రద్ధా మేధా మతిః కాంతిరార్యా షోడశశక్తయః || ౬౯ ||

నీలజీమూతసంకాశాః కరవాలకరాంబుజాః |
సమాః ఖేటకధారిణ్యో యుద్ధోపక్రాంతమానసాః || ౭౦ ||

సేనాన్యః సకలా ఏతాః శ్రీదేవ్యా జగదీశితుః |
ప్రతిబ్రహ్మాండసంస్థానాం శక్తీనాం నాయికాః స్మృతాః || ౭౧ ||

బ్రహ్మాండక్షోభకారిణ్యో దేవీ శక్త్యుపబృంహితాః |
నానారథసమారూఢా నానాశక్తిభిరన్వితాః || ౭౨ ||

ఏతత్పరాక్రమం వక్తుం సహస్రాస్యోఽపి న క్షమః |
ఇంద్రనీలమహాసాలాదగ్రే తు బహువిస్తృతః || ౭౩ ||

ముక్తాప్రాకార ఉదితో దశయోజనదైర్ఘ్యవాన్ |
మధ్యభూః పూర్వవత్ప్రోక్తా తన్మధ్యేఽష్టదళాంబుజమ్ || ౭౪ ||

ముక్తామణిగణాకీర్ణం విస్తృతం తు సకేసరమ్ |
తత్ర దేవీసమాకారా దేవ్యాయుధధరాః సదా || ౭౫ ||

సంప్రోక్తా అష్టమంత్రిణ్యో జగద్వార్తాప్రబోధికాః |
దేవీసమానభోగాస్తా ఇంగితజ్ఞాస్తు పండితాః || ౭౬ ||

కుశలాః సర్వకార్యేషు స్వామికార్యపరాయణాః |
దేవ్యభిప్రాయబోధ్యస్తాశ్చతురా అతిసుందరాః || ౭౭ ||

నానాశక్తిసమాయుక్తాః ప్రతిబ్రహ్మాండవర్తినామ్ |
ప్రాణినాం తాః సమాచారం జ్ఞానశక్త్యా విదంతి చ || ౭౮ ||

తాసాం నామాని వక్ష్యామి మత్తః శృణు నృపోత్తమ |
అనంగకుసుమా ప్రోక్తాప్యనంగకుసుమాతురా || ౭౯ ||

అనంగమదనా తద్వదనంగమదనాతురా |
భువనపాలా గగనవేగా చైవ తతః పరమ్ || ౮౦ ||

శశిరేఖా చ గగనరేఖా చైవ తతః పరమ్ |
పాశాంకుశవరాభీతిధరా అరుణవిగ్రహాః || ౮౧ ||

విశ్వసంబంధినీం వార్తాం బోధయంతి ప్రతిక్షణమ్ |
ముక్తాసాలాదగ్రభాగే మహామారకతోఽపరః || ౮౨ ||

సాలోత్తమః సముద్దిష్టో దశయోజనదైర్ఘ్యవాన్ |
నానాసౌభాగ్యసంయుక్తో నానాభోగసమన్వితః || ౮౩ ||

మధ్యభూస్తాదృశీ ప్రోక్తా సదనాని తథైవ చ |
షట్కోణమత్ర విస్తీర్ణం కోణస్థా దేవతాః శృణుః || ౮౪ ||

పూర్వకోణే చతుర్వక్త్రో గాయత్రీసహితో విధిః |
కుండికాక్షగుణాభీతిదండాయుధధరః పరః || ౮౫ ||

తదాయుధధరా దేవీ గాయత్రీ పరదేవతా |
వేదాః సర్వే మూర్తిమంతః శాస్త్రాణి వివిధాని చ || ౮౬ ||

స్మృతయశ్చ పురాణాని మూర్తిమంతి వసంతి హి |
యే బ్రహ్మవిగ్రహాః సంతి గాయత్రీవిగ్రహాశ్చ యే || ౮౭ ||

వ్యాహృతీనాం విగ్రహాశ్చ తే నిత్యం తత్ర సంతి హి |
రక్షఃకోణే శంఖచక్రగదాంబుజకరాంబుజా || ౮౮ ||

సావిత్రీ వర్తతే తత్ర మహావిష్ణుశ్చ తాదృశః |
యే విష్ణువిగ్రహాః సంతి మత్స్యకూర్మాదయోఽఖిలాః || ౮౯ ||

సావిత్రీవిగ్రహా యే చ తే సర్వే తత్ర సంతి హి |
వాయుకోణే పరశ్వక్షమాలాభయవరాన్వితః || ౯౦ ||

మహారుద్రో వర్తతేఽత్ర సరస్వత్యపి తాదృశీ |
యే యే తు రుద్రభేదాః స్యుర్దక్షిణాస్యాదయో నృప || ౯౧ ||

గౌరీభేదాశ్చ యే సర్వే తే తత్ర నివసంతి హి |
చతుఃషష్ట్యాగమా యే చ యే చాన్యేఽప్యాగమాః స్మృతాః || ౯౨ ||

తే సర్వే మూర్తిమంతశ్చ తత్రైవ నివసంతి హి |
అగ్నికోణే రత్నకుంభం తథా మణికరండకమ్ || ౯౩ ||

దధానో నిజహస్తాభ్యాం కుబేరో ధనదాయకః |
నానావీథీసమాయుక్తో మహాలక్ష్మీసమన్వితః || ౯౪ ||

దేవ్యా నిధిపతిస్త్వాస్తే స్వగుణైః పరివేష్టితః |
వారుణే తు మహాకోణే మదనో రతిసంయుతః || ౯౫ ||

పాశాంకుశధనుర్బాణధరో నిత్యం విరాజతే |
శృంగారా మూర్తిమంతస్తు తత్ర సన్నిహితాః సదా || ౯౬ ||

ఈశానకోణే విఘ్నేశో నిత్యం పుష్టిసమన్వితః |
పాశాంకుశధరో వీరో విఘ్నహర్తా విరాజతే || ౯౭ ||

విభూతయో గణేశస్య యా యాః సంతి నృపోత్తమ |
తాః సర్వా నివసంత్యత్ర మహైశ్వర్యసమన్వితాః || ౯౮ ||

ప్రతిబ్రహ్మాండసంస్థానాం బ్రహ్మాదీనాం సమష్టయః |
ఏతే బ్రహ్మాదయః ప్రోక్తాః సేవంతే జగదీశ్వరీమ్ || ౯౯ ||

మహామారకతస్యాగ్రే శతయోజనదైర్ఘ్యవాన్ |
ప్రవాలసాలోఽస్త్యపరః కుంకుమారుణవిగ్రహః || ౧౦౦ ||

మధ్యభూస్తాదృశీ ప్రోక్తా సదనాని చ పూర్వవత్ |
తన్మధ్యే పంచభూతానాం స్వామిన్యః పంచ సంతి చ || ౧౦౧ ||

హృల్లేఖా గగనా రక్తా చతుర్థీ తు కరాళికా |
మహోచ్ఛుష్మా పంచమీ చ పంచభూతసమప్రభాః || ౧౦౨ ||

పాశాంకుశవరాభీతిధారిణ్యోఽమితభూషణాః |
దేవీసమానవేషాఢ్యా నవయౌవనగర్వితాః || ౧౦౩ ||

ప్రవాలసాలాదగ్రే తు నవరత్నవినిర్మితః |
బహుయోజనవిస్తీర్ణో మహాసాలోఽస్తి భూమిప || ౧౦౪ ||

తత్ర చామ్నాయదేవీనాం సదనాని బహూన్యపి |
నవరత్నమయాన్యేవ తడాగాశ్చ సరాంసి చ || ౧౦౫ ||

శ్రీదేవ్యా యేఽవతారాః స్యుస్తే తత్ర నివసంతి హి |
మహావిద్యా మహాభేదాః సంతి తత్రైవ భూమిప || ౧౦౬ ||

నిజావరణదేవీభిర్నిజభూషణవాహనైః |
సర్వదేవ్యో విరాజంతే కోటిసూర్యసమప్రభాః || ౧౦౭ ||

సప్తకోటిమహామంత్రదేవతాః సంతి తత్ర హి |
నవరత్నమయాదగ్రే చింతామణిగృహం మహత్ || ౧౦౮ ||

తత్రత్యం వస్తుమాత్రం తు చింతామణివినిర్మితమ్ |
సూర్యోద్గారోపలైస్తద్వచ్చంద్రోద్గారోపలైస్తథా || ౧౦౯ ||

విద్యుత్ప్రభోపలైః స్తంభాః కల్పితాస్తు సహస్రశః |
యేషాం ప్రభాభిరంతఃస్థం వస్తు కించిన్న దృశ్యతే || ౧౧౦ ||

ఇతి శ్రీమద్దేవీభాగవతే మహాపురాణే ద్వాదశస్కంధే పద్మరాగాదిమణివినిర్మితప్రాకారవర్ణనం నామైకాదశోఽధ్యాయః |

Goddess Sri Lalitha Posts:

Manidweepa Varnanam (Devi Bhagavatam) Part 3 in Telugu | మణిద్వీపవర్ణనం (దేవీభాగవతం) – 3

Manidweepa Varnanam (Devi Bhagavatam) Part 1 in Telugu | మణిద్వీపవర్ణనం (దేవీభాగవతం) – 1

Manidweepa Varnana Lyrics in Telugu | మణిద్వీపవర్ణన (తెలుగు)

శ్రీ లలితా షోడశోపచార పూజ – Sri Lalitha Shodasopachara Puja in Telugu

What happens if Lalitha Sahasranamam is chanted wrong?

శ్రీ లలితా సహస్రనామావళిః – Sri Lalitha Sahasranamavali

శ్రీ లలితా సహస్ర నామ స్తోత్రం ఉత్తరపీఠిక – Sri Lalitha Sahasranama Stotram Uttarapeetika

శ్రీ లలితా సహస్రనామ స్తోత్రరత్నం పూర్వపీఠికా – Sri Lalitha Sahasranama Stotram Poorvapeetika

శ్రీ లలితా త్రిశతీ స్తోత్రరత్నం ఫలశృతి (ఉత్తర పీఠిక) – Sri Lalitha Trisati Stotram Uttarapeetika

శ్రీ లలితా త్రిశతీ స్తోత్రరత్నం – Sri Lalitha Trishati Stotram

శ్రీ లలితా త్రిశతీ స్తోత్రరత్నం పూర్వపీఠిక – Sri Lalitha Trisati Stotram Poorvapeetika

శ్రీ లలిత అష్టోత్తర శతనామావళి – Sri Lalitha Ashtottara Satanamavali

శ్రీ లలితా సంక్షేప నామావళి – Sri Lalitha Samkshepa Namavali