Bhagavan manasa pooja
హృదంభోజే కృష్ణః సజలజలదశ్యామలతనుః
సరోజాక్షః స్రగ్వీ ముకుటకటకాద్యాభరణవాన్ |
శరద్రాకానాథప్రతిమవదనః శ్రీమురలికాం
వహన్ ధ్యేయో గోపీగణపరివృతః కుంకుమచితః || ౧ ||
పయోఽంభోధేర్ద్వీపాన్మమ హృదయమాయాహి భగవన్
మణివ్రాతభ్రాజత్కనకవరపీఠం భజ హరే |
సుచిహ్నౌ తే పాదౌ యదుకులజ నేనేజ్మి సుజలైః
గృహాణేదం దూర్వాఫలజలవదర్ఘ్యం మురరిపో || ౨ ||
త్వమాచామోపేంద్ర త్రిదశసరిదంభోఽతిశిశిరం
భజస్వేమం పంచామృతఫలరసాప్లావమఘహన్ |
ద్యునద్యాః కాలింద్యా అపి కనకకుంభస్థితమిదం
జలం తేన స్నానం కురు కురు కురుష్వాచమనకమ్ || ౩ ||
తటిద్వర్ణే వస్త్రే భజ విజయకాంతాధిహరణ
ప్రలంబారిభ్రాతర్మృదులముపవీతం కురు గలే |
లలాటే పాటీరం మృగమదయుతం ధారయ హరే
గృహాణేదం మాల్యం శతదళతులస్యాదిరచితమ్ || ౪ ||
దశాంగం ధూపం సద్వరద చరణాగ్రేఽర్పితమిదం
ముఖం దీపేనేందుప్రభవిరజసం దేవ కలయే |
ఇమౌ పాణీ వాణీపతినుత సకర్పూరరజసా
విశోధ్యాగ్రే దత్తం సలిలమిదమాచామ నృహరే || ౫ ||
సదా తృప్తాన్నం షడ్రసవదఖిలవ్యంజనయుతం
సువర్ణామత్రే గోఘృతచషకయుక్తే స్థితమిదమ్ |
యశోదాసూనో తత్పరమదయయాశాన సఖిభిః
ప్రసాదం వాంఛద్భిః సహ తదను నారం పిబ విభో || ౬ ||
సచూర్ణం తాంబూలం ముఖశుచికరం భక్షయ హరే
ఫలం స్వాదు ప్రీత్యా పరిమలవదాస్వాదయ చిరమ్ |
సపర్యాపర్యాత్యై కనకమణిజాతం స్థితమిదం
ప్రదీపైరారార్తి జలధితనయాశ్లిష్ట రచయే || ౭ ||
విజాతీయైః పుష్పైరతిసురభిర్బిల్వతులసీ
యుతైశ్చేమం పుష్పాంజలిమజిత తే మూర్ధ్ని నిదధేస్ |
తవ ప్రాదక్షిణ్యక్రమణమఘవిధ్వంసి రచితం
చతుర్వారం విష్ణో జనిపథగతశ్చాంతవిదుషా || ౮ ||
నమస్కారోఽష్టాంగః సకలదురితధ్వంసనపటుః
కృతం నృత్యం గీతం స్తుతిరపి రమాకాంత త ఇయమ్ |
తవ ప్రీత్యై భూయాదహమపి చ దాసస్తవ విభో
కృతం ఛిద్రం పూర్ణం కురు కురు నమస్తేఽస్తు భగవన్ || ౯ ||
సదా సేవ్యః కృష్ణః సజలఘననీలః కరతలే
దధానో దధ్యన్నం తదను నవనీతం మురలికామ్ |
కదాచిత్కాంతానాం కుచకలశపత్రాలిరచనా
సమాసక్తః స్నిగ్ధైః సహ శిశువిహారం విరచయన్ || ౧౦ ||
Lord Krishna Related Stotras
శ్రీ కృష్ణ అష్టోత్తర శతనామవళిః – Sri Krishna Ashtottara Satanamavali
Sri Krishna Ashtottara Shatanama Stotram | శ్రీ కృష్ణాష్టోత్తర శతనామ స్తోత్రం
Sri Krishna Stotram (Vasudeva Krutam) | శ్రీ కృష్ణ స్తోత్రం (వసుదేవ కృతం)
Sri Krishna Stotram (Narada Rachitam) | శ్రీ కృష్ణ స్తోత్రం (నారద రచితం)
