మీనం

పూర్వాభాద్ర 4వ పాదం, ఉత్తరాభాద్ర 1,2,3,4 పాదాలు, రేవతి 1,2,3,4 పాదాలు

మీన రాశి వారి ఫలితాలు (ఏప్రిల్ 18 నుండి 24 వరకు)

Plava Nama Samvatsara Meena Rasi Phalalu

ఈ రాశివారికి ది. 20-11-2021 వరకు గురుడు 11వ యింట సువర్ణమూర్తి, తదుపరి 12వ యింట తామ్రమూర్తిగా సంచారం చేయనున్నారు. శనీశ్వరుడు సంవత్సరం మొత్తం 11వ యింట తామ్రమూర్తిగా సంచారం చెయ్యనున్నారు. రాహు-కేతువులు సంవత్సరాంతం వరకు 3-9 స్థానాలలో తామ్రమూర్తులుగా సంచరిస్తారు.

చాలా కాలము తరువాత దీర్ఘ సంచార గ్రహములు అయిన గురు, శనుల సంపూర్ణ అనుగ్రహము ఈ రాశి వారికి లభించినది. ముఖ్యంగా లాభస్థానమందు శని-గురులు విశేష శుభఫలితాలు ఇవ్వనున్నారు. అంతేకాక “అర్ధాష్టమ రాహు” దోషము కూడా తొలగిపోయినది కావున గోచార రీత్యా పూర్తి శుభఫలితాలు రానున్నాయి. జాతక రీత్యా యోగ్యమయిన దశలు నడిచినచో ఈ రాశివారికి అఖండ రాజయోగము పట్టును.

లాభమందు గురుసంచారము వలన “యశోవృద్ధిర్బలంతేజ సర్వత్రవిజయస్సుఖమ్” అను శాస్త్రవచనం ప్రకారం సమాజమందు గౌరవ, మర్యాదలు పెరుగుతాయి. నూతన ఉత్సాహము, సంతోషము కలుగుతుంది. పనులన్నీ సకాలములో పూర్తవుట, విద్యార్థులు ఉన్నత శ్రేణిలో రాణించుట, ఉద్యోగంలో పదోన్నతి, ఆర్ధిక పరిస్థితి మెరుగుపడటం జరుగును. శత్రువులపై సంపూర్ణ ఆధిపత్యాన్ని ప్రదర్శిస్తారు. వ్యాపారంలో ఉన్నతమయిన అభివృద్ధి కనబడుతుంది. ఋణభారం తగ్గుతుంది.

లాభ శని సంచారము వలన “ధనధాన్యాది వృద్ధించ స్త్రీపుత్ర సుఖవర్ధనమ్, అను శాస్త్రవచనం ప్రకారం ఆర్ధిక పరిస్థితి బాగుగా ఉంటుంది. శుభకార్యక్రమములు చేస్తారు. వ్యవసాయము బాగుగా వుంటుంది. సంతానము కలుగుతుంది. లగ్జరీ వస్తువులు కొనుగోలు చేస్తారు. నూతన వాహన సౌఖ్యము, వస్త్ర లాభము కలుగును. ఏ పని ప్రారంభించినా వాటిలో ఎటువంటి అవాంతరములు లేకుండా సకాలంలో పనులు పూరి చేస్తారు.

చాలాకాలంగా ముందుకు సాగని పనులను ఏప్రిల్ 6లోపు ప్రారంభించుట ద్వారా పనులు, విఘ్నములు లేకుండా పూర్తవును. ఏప్రిల్ 6 తదుపరి గురువు 12వ స్థాన సంచారము వలన “శుభములో వ్యయశ్చైవ ప్రాణివిక్రయ దూషణం” అను శాస్త్రవచనం ప్రకారం శుభకార్యక్రమములకు ధనాన్ని ఖర్చు చేస్తారు. స్థానచలనము వంటివి జరుగును.

రాహు తృతీయ స్థాన సంచారము వలన “మానహానిర్మనక్లేశం ధైర్యహానిస్తదైవచ” అను శాస్త్ర వచనం ప్రకారము మానసిక భయము అధికము. అన్నదమ్ములతో విరోధము, కోర్టు వ్యవహారములు ఒక కొలిక్కి వచ్చును.

గత సంవత్సరంతో పోల్చుకుంటే ఈ సంవత్సరము మెరుగయిన ఫలితాలు రానున్నాయి. వీరు మరింత అనుకూల ఫలితములు పొందుటకు షష్ఠి తిథి రోజున ‘సర్ప సూక్తము’తో సుబ్రహ్మణ్యేశ్వర స్వామి అభిషేకము చేసిన మంచిది.